da sora Maria Vincenz
Cu Jesus ei vegnius en siu marcau nativ, han ins nuota salidau el sco in dils lur. Plitost han ins retschiert el sco in jester, il qual sto sesuttametter igl emprem ad in examen. Negliu vegnin nus mustergiai pli fetg sco leu, nua che nus essan carschi si. – Jesus vegn en siu marcau nativ buc mo per salidar sia famiglia, mobein era per instruir, per purtar la nuviala da siu Bab. Quei leventa els convischins enzatgei sco in malesser, sco ina malsegirtad, forsa era scuidonza: «Danunder ha el quella savida, el ei gie mo in scrinari…?» Ella sinagoga salidan ins Jesus buc pli sco lur amitg. Ins pren scandel. Il contact ei disturbaus, sche buca ruts giu. – Jesus fa ina experientscha fetg tresta. Negliu vegn il profet sbittaus ton sco en siu agen vitg, en si’atgna famiglia.
Mc 6,1–6
1Da leu ei Jesus serendius en siu marcau nativ, e ses giuvnals han cumpignau el. 2Il sabat ha el entschiet ad instruir ella sinagoga; ed ils biars che tedlavan sesmarvigliavan e schevan: Danunder ha el quei? Tgei sabientscha ei quei ch’ei dada ad el? E quellas grondas miraclas che daventan entras ses mauns! 3Ei quei buc il scrinari, il fegl da Maria, il frar da Giachen, da Giusep, da Judas e Simon? Ein sias soras buca cheu en nies miez? Ed els han priu scandel dad el. 4E Jesus ha detg ad els: In profet ei buca sbittaus dano en sia patria, en sia parentella ed en sia famiglia. 5Ed el ha saviu far leu buc ina miracla. Mo ad enzacons malsauns ha el imponiu ils mauns e medegau els. 6Ed el ha fatg curvien da lur nuncardientscha.
El ei ius els vitgs dil contuorn ed ha instruiu.
