da sur Martin Bearth
In grond pievel spetga sin Jesus alla riva dalla mar da Galilea. Ein els vegni ord marveglias, plein desideri, ni spetgan els agid da Jesus, sco Jairus, il parsura dalla sinagoga? Sia feglia da 12 onns ei sin murir. Jesus pren serius il grond pitir da Jairus, semetta immediat sin via cun el e vegn a casa tier el e medeghescha la grevmalsauna. Sin via tucca ina dunna malsauna il manti da Jesus e vegn liberada da siu mal zuppau. Sia cardientscha ha spindrau ella, e la cardientscha da Jairus ha spindrau sia feglia. Domisduas gadas numna Jesus la cardientscha sco motiv da siu agid. In appel era a nus: «Buca tema! Ti stos mo crer», di el era a nus. El ei pli ferms che malsogna e mort, mo el quenta era cun nossa cardientscha, nossa fidonza.
Mc 5,21–43
21Cu Jesus ei puspei arrivaus en barca sin l’autra riva, ei in grond pievel seradunaus entuorn el, ed el steva alla riva dalla mar. 22Cheu ei in parsura dalla sinagoga cun num Jairus vegnius neutier. Strusch ch’el ha viu Jesus, eis el curdaus avon ses peis 23ed ha supplicau el instantamein: Mia feglia ei sin murir. Neu ed impona ad ella ils mauns, per ch’ella revegni e vivi. 24Jesus ei ius cun el, e bia pievel suandava el e sestuschava entuorn el.
25Ed ina dunna che piteva gia dudisch onns da flussiun dil saung 26e veva endirau bia da biars miedis e veva duvrau tut sia facultad, senza ch’ei fuss vegniu meglier, anzi, ei mava plitost mender; 27quella dunna veva udiu a plidond da Jesus, ed ella ei vegnida davos neu ella fuola ed ha tuccau siu manti. 28Pertgei ella scheva: Sche jeu vegnel era mo da tuccar siu vestgiu, vegn jeu ad esser sauna. 29E cuninaga ha il saung calau da cuorer, ed ella ha sentiu vid siu tgierp ch’ella fuva medegada da sia malsogna. 30Immediat ha Jesus encurschiu ch’ina forza fuva sortida dad el, e sevulvend tier il pievel ha el dumandau: Tgi ha tuccau miu vestgiu? 31Ses giuvnals han detg ad el: Ti vesas la fuola che sestauscha entuorn tei e damondas aunc: Tgi ha tuccau mei? 32Mo el ha mirau entuorn per veser quella che veva fatg quei. 33E la dunna che saveva bein avunda tgei ch’era daventau cun ella ei vegnida neutier plein tema e tut a tremblond, ei sefretga avon ses peis ed ha detg ad el tut la verdad. El denton ha detg: 34Mia feglia, tia cardientscha ha spindrau tei; va en pasch e seigies medegada da tia malsogna.
35Ferton ch’el plidava aunc, ei glieud dil parsura dalla sinagoga vegnida ed ha detg ad el: Tia feglia ei morta. Pertgei mulestas aunc il mussader? 36Mo Jesus che veva udiu quels plaids ha detg al parsura dalla sinagoga: Buca tema! Ti stos mo crer. 37Ed el ha schau vegnir cun el mo Pieder, Giachen e Gion, il frar da Giachen. 38Els ein arrivai tier la casa dil parsura dalla sinagoga, ed el ha viu il smugl e quels che bargevan e pliravan. 39El ei entraus ed ha detg ad els: Pertgei tanienta canera e ton bargialem? Igl affon ei buca morts, el mo dorma. 40Ed els mo fagevan beffas cun el. El denton ha catschau giuado tuts, ha priu il bab e la mumma digl affon e quels che fuvan cun el ed ei entraus, leu nua ch’igl affon fuva. 41E prendend il maun digl affon, ha el detg: Talita cumi, quei vul dir: Mattella, jeu ditgel a ti, leva! 42Immediat ei la mattetta levada ed ei ida entuorn. Ella veva dudisch onns. Ed els ein sesmarvigliai grondamein. 43Ed el ha cumandau rigurusamein ad els, che negin dueigi saver quei. Lu ha el fatg dar da magliar ad ella.
