da Flurina Cavegn-Tomaschett
Igl evangeli dalla fiasta da Tschuncheismas ei cuorts, mo intensivs. En ina emprema part descriva s. Gion, co ils giuvnals ein serimnai la sera dil schabetg da Pastgas. Davart il liug dalla rimnada tradescha el nuot, denton ch’els vevan serrau l’escha. Ins sa supponer ch’els temevan, ch’era els savessien vegnir truai semegliont sco lur menader, Jesus. L’escha serrada ei negin impediment per Jesus. El para da saver entrar, perquei ch’el posseda la clav dils cors da sias giuvnalas e ses giuvnals. Duas ga salida el ils presents cun «Pasch cun vus!», quei che muossa l’impurtonza da quei giavisch. Igl ei bein capeivel, ch’ils giuvnals han buca gest enconuschiu Jesus, il levau. Da quei raquentan era auters evangelis. Per s’identificar muossa Jesus ils fastitgs da sia tortura vid la crusch: ils mauns perfurai dallas guotas e la costa maltractada dalla lontscha. Ed ils presents han tutta raschun da selegrar, che Jesus Cristus ei puspei presents en lur miez, ch’el fuorma vinavon il center da lur veta.
La secunda part digl evangeli mira el futur. Era sche la veta terrestra da Jesus era uss a fin, dueva siu messadi cuntinuar. Cugl agid dil Spert Sogn ein ils giuvnals e las giuvnalas ussa responsabels, da derasar el mund la Buna Nova dil Reginavel da Diu. Quei regal che Cristus fa a ses giuvnals surdat el entras il flad, in ferm simbol per veta nova. Uss ein els clamai da purtar al mund la «Pasch cun vus».
Gn 20,19–23
19La sera digl emprem di dalla jamna, cura ch’ils giuvnals eran radunai per tema dils Gedius davos escha serrada, ei Jesus vegnius, ei staus en lur miez ed ha detg ad els: Pasch cun vus! 20Suenter quei salid ha el mussau ad els ses mauns e sia costa. Vesend il Segner, ein ses giuvnals selegrai. 21Jesus ha turnau a dir ad els: Pasch cun vus! Sco il Bab ha tarmess mei, aschia tarmettel jeu vus. 22Suenter quels plaids ha el fladau sin els e detg: Retschevei il Spert sogn. 23A quels che vus relascheis ils puccaus, ein els relaschai; a quels che vus retenis els, ein els reteni.
