da Maria Cristina Derungs-Bartolomei
Quella secziun dil text ei la cuntinuaziun digl Evangeli della dumengia vargada. Ei setracta adina dil liung discuors de comiau che Jesus drezza a ses discipels alla fin della davosa tscheina. Sche nus sedumandein oz co «star en contact» cun Jesus, lu schein nus il bia «cun tedlar il Plaid de Diu e separticipar als Sacraments e specialmein all’Eucaristia». Quei ei ver e gest! Mo la finamira de quei ei de viver ella carezia. Quei ei la moda d’haver part della Levada, della veta nova. «Tgi che careza buc, resta ella mort» (1 Gn 3,14), perquei che «Dieus ei carezia, e tgi che resta ella carezia, quel resta en Diu e Dieus enten el» (1 Gn 4,16). La carezia ei il ligiom de veta denter il Bab ed il Fegl; quella vegn communicada dal Spert dil Vivent a nus, e s’exprima ella carezia per il proxim. Far «circular» el mund quella carezia «che perduna tut, spera tut, suffiera tut» (1 Cor 13,7) ei il «camond», il «mandat», l’incarica per tut ils discipels de tut ils temps: «Vida quei san tuts enconuscher che vus essas mes giuvnals, sche vus demusseis carezia in per l’auter» (Gn 13,35). Da purtar quei fretg essan nus vegni fatgs habels; quei ei la fontauna della legria; quei ei il dun che vegn adina concedius dal Bab a tgi che damonda quel en num de Jesus.
Gn 15,9–17
9Sco il Bab ha carezau mei, aschia hai era jeu carezau vus; restei en mia carezia! 10Sche vus tenis mes camondaments, resteis vus en mia carezia, sco jeu hai teniu ils camondaments da miu Bab e restel en sia carezia. 11Quei hai jeu detg a vus, per che mia legria seigi en vus e vossa legria daventi cumpleina. 12Quei ei miu camondament: Carezei in l’auter, sco jeu hai carezau vus! 13Ei dat buc ina pli gronda carezia che da dar la veta per ses amitgs. 14Vus essas mes amitgs, sche vus fageis quei che jeu camondel a vus. 15Jeu numnel vus buca pli fumegls; pertgei il fumegl sa buca tgei che siu patrun fa. Jeu hai numnau vus amitgs, perquei che jeu hai revelau a vus tut quei che jeu hai udiu da miu Bab. 16Buca vus veis eligiu mei, mobein jeu hai eligiu vus e destinau vus dad ir e purtar fretg, e vies fretg duei restar. Lu vegn il Bab a dar a vus tut quei che vus rugheis el en miu num. 17Quei camond jeu a vus: Carezei in l’auter!
