dad Andri Casanova-Baumgartner
Els davos capetels digl evangeli tenor Gion cumpara Jesus a singulas persunas ed ad entiras gruppas. Tut quellas enzennas da Jesus ein screttas per retscheiver la cardientscha (mira Gn 20,30–31), pia era per che nus saveien far pass vier il Cristus ch’ei levaus da mort en veta.
Igl ei buca clar, tgi che quels giuvnals che seradunan ein. Il plaid giuvnals vegn numnadamein buca mo duvraus per ils dudisch apostels. Pia pon era Maria Madleina, Giusep d’Arimatea, Nicodemus e biars auters esser stai presents. Igl evangeli dat buca risposta en caussa. Mo el di exactamein, cu quei ei stau: «la sera digl emprem di dalla jamna» (mira Gn 20,19), pia la sera dil di dalla levada, la dumengia sera.
Entras la fladada da Jesus ed il regal dil Spert sogn duei la dumengia dacheudenvi buc esser in di da tema, mobein in di da legria. La dumengia ei il di dalla levada ed il di da nies batten.
Gn 20,19–31
19La sera digl emprem di dalla jamna, cura ch’ils giuvnals eran radunai per tema dils Gedius davos escha serrada, ei Jesus vegnius, ei staus en lur miez ed ha detg ad els: Pasch cun vus! 20Suenter quei salid ha el mussau ad els ses mauns e sia costa. Vesend il Segner, ein ses giuvnals selegrai. 21Jesus ha turnau a dir ad els: Pasch cun vus! Sco il Bab ha tarmess mei, aschia tarmettel jeu vus. 22Suenter quels plaids ha el fladau sin els e detg: Retschevei il Spert sogn. 23A quels che vus relascheis ils puccaus, ein els relaschai; a quels che vus retenis els, ein els reteni.
24Tumasch, in dils dudisch, numnaus Schumellin, fuva buca cun els, cura che Jesus ei vegnius. 25Ils auters giuvnals han detg ad el: Nus vein viu il Segner. El ha rispundiu ad els: Sche jeu vesel buca la noda dallas guotas vid ses mauns e sai buca tschentar miu det el liug dallas guotas e miu maun en sia costa, creiel jeu buc. 26Otg dis pli tard fuvan ses giuvnals puspei en casa, e Tumasch fuva cun els. Cheu ei Jesus vegnius, ferton che l’escha fuva serrada. El ei staus en lur miez ed ha detg: Pasch cun vus! 27Lu ha el detg a Tumasch: Dai neu tiu det e mira mes mauns; pren tiu maun e tschenta el en mia costa e seigies buca nuncartents, mobein cartents! 28Tumasch ha rispundiu ad el: Miu Signur e miu Diu! 29Jesus ha detg ad el: Perquei che ti has viu mei, creias ti? Beai ein quels che vesan buc e creian tonaton!
30Jesus ha fatg en preschientscha da ses giuvnals aunc bia autras enzennas ch’ein buca screttas en quest cudisch. 31Quellas denton ein screttas, per che vus carteies che Jesus ei il Cristus, il Fegl da Diu, e per che vus veies tras la cardientscha la veta en siu num.
