da sora Maria Vincenz
Denter «hosanna» e «vid la crusch cun el»!
Cun palmas, vestgius rasai ora sin via, giubel e cloms da hosanna vegnin nus oz confruntai els texts biblics.
Ed il medem temps meditein nus la passiun da Jesus, siu pitir profund e sia mort brutala. Omisdus – legria e pitir – saudan ella veta da Jesus.
Mo tras tutta stgiradetgna dil pitir e murir da Jesus resplenda gia oz la glisch e la speronza dalla levada. Pitir e murir han buca il davos plaid.
Omisdus – legria e pitir – saudan era en nossa veta. La liturgia dalla dumengia da palmas envida en nus d’accumpignar Jesus naven da Betfage e Betania, naven digl iert dallas ulivas viers Jerusalem, naven da Jerusalem sil Golgota, naven dalla fossa alla levada. Lein ir quella via, savend e cartend che quella ei era nossa via, sin la quala Jesus accumpogna era nus.
Mc 1,1–10
1Sin viadi viers Jerusalem ein ei vegni a Betfage e Betania, damaneivel dil Cuolm dallas ulivas. Leu ha Jesus tarmess dus da ses giuvnals 2e detg ad els: Mei el vitg davon vus. Immediat cu vus entreis el vitg, anfleis vus leu in pulein rentaus. Sin quel ei aunc negin sesius. Disrentei el e vegni cun el. 3E sch’enzatgi di a vus: Tgei fageis cheu? – sche rispundei: II Segner drova el, mo vegn beingleiti a turnar el. 4Els ein i ed han anflau in pulein rentaus sper ina porta ordaviert sin via. Ed ei han fatg liber el.
5Zacons da quels che stevan leu han dumandau els: Tgei veis vus da far liber quei pulein? 6EIs han rispundiu sco Jesus veva detg ad els, ed ins ha schau cumbien els. 7Ei han menau il pulein tier Jesus, han fiers lur mantials sin el, e Jesus ei sesius sin el. 8Biars sternevan lur vestgadira sin via, auters in pugn plein verd ch’ei sdrappavan sil funs. 9E quels che mavan ordavon e quels che suandavan, grevan:
Hosanna!
Benedius sei quel che vegn en num dil Segner!
10Benedius il reginavel che vegn,
il reginavel da nies bab David!
Hosanna ellas altezias!
11EI ei entraus el marcau da Jerusalem, el tempel. Havend contemplau tut, eis el ius culs dudisch a Betania, pertgei ei fuva gia tard.
