da Maria Cristina Derungs-Bartolomei
Quels plaids digl evangeli concludan la sentupada (discusa, da notg) de Nicodemus, in farisè e magistrat dils Gedius, cun Jesus che annunzia ad el la nova naschientscha da surengiu, dal Spert per astgar entrar el reginavel de Diu. Quei ei pusseivel pér cura ch’il Fegl vegn «alzaus si» tier il Bab silla crusch, ella levada ed ascensiun.
Sco castitg per lur rebelliun el viadi tras il desiert, eran siarps tussegadas vegnidas tarmessas als Israelits. Mo sin camond de Diu fa Moses ina siarp d’irom ed aulza quella sin in pal. Tgi che mira sin la siarp d’irom miera buca dallas miersas. Era nus essan envidai d’alzar ils egls da nies egoissem, renconuschend el crucifigau disfigurau il victur glorius della mort e dil mal, il Fegl tarmess dalla carezia de Diu per spindrar il mund. Crer en el dat a nus access alla nova e perpetna veta. Quei pretenda d’exponer nossa veta alla glisch de Jesus e – sco ellas empermischuns dil Batten – refusar la stgiradetgna, pia refusar de dar suatientscha al mal.
Gn 3,14–21
14Pertgei sco Moses ha alzau la siarp el desiert, aschia sto il Fegl dil carstgaun vegnir alzaus, 15sinaquei che scadin che crei hagi en el veta perpetna. 16Aschizun ha Dieus carezau il mund, ch’el ha dau vi siu unic Fegl, sinaquei che scadin che crei en el mondi buc a piarder, mobein hagi veta perpetna. 17Pertgei Dieus ha buca tarmess siu Fegl el mund, per ch’el trueschi il mund, mobein per ch’il mund vegni spindraus entras el. 18Tgi che crei en el, vegn buca truaus; tgi che crei buc, ei gia truaus, perquei ch’el ha buca cartiu el num digl unic Fegl da Diu. 19En quei consista il truament: La glisch ei vegnida el mund, mo ils carstgauns han carezau la stgiradetgna pli fetg che la glisch; pertgei lur ovras fuvan schliatas. 20Scadin che fa dil mal, odiescha la glisch e vegn buc alla glisch, per che sias ovras vegnien buca scuvretgas. 21Mo quel che fa la verdad, vegn alla glisch, per ch’ei vegni paleis che sias ovras ein fatgas en Diu.
