dad Andri Casanova-Baumgartner
Amiez igl evangeli tenor Marcus vegn Jesus proclamaus a moda tut speciala sco Fegl carezau da Diu. Quei raquen dalla transfiguraziun exprima ch’il reginavel da Diu ei gia presents. Entras la veta ed igl operar da Jesus ei il reginavel da Diu gia daventaus realitad el mund. El ei buca mo enzatgei futur, anzi, el pertucca nies mintgadi e nossa veta.
Ual la distanza denter ils eveniments entuorn Jesus ed il trot da mintgadi fageva quitau allas giuvnas cuminonzas cristianas. Ils vegls pudevan forsa aunc esser perdetgas da Jesus. Mo per la gronda part dominava la realitad ch’il mintgadi e la veta mondien vinavon. Tonpli fuva ei impurtont da tschentar la damonda, «tgei che quei vegli dir: Levar da mort en veta» (9,10). Ei fuva necessari da realisar in tec alla gada ch’il Fegl da Diu hagi era transfigurau nies esser carstgaun.
Mc 9,2–10
2Sis dis pli tard ha Jesus priu cun el Pieder, Giachen e Gion ed ei ius cun els persuls d’ina vart, sin in ault cuolm. Ed el ei vegnius transfiguraus avon els. 3E sia vestgadira ei daventada tarlischonta e schi alva, sco buc in sblihider sin tiara savess far vegnir alva. 4Elia ei cumparius ad els ensemen cun Moses, e domisdus discurrevan cun Jesus. 5Cheu ha Pieder priu il plaid e detg a Jesus: Rabbi, igl ei bien che nus essan cheu. Nus lein far treis tendas, ina per tei, ina per Moses ed ina per Elia. 6El saveva numnadamein buca tgei ch’el scheva, aschizun eran els surpri dalla tema. 7Ed ina nebla ei vegnida ed ha umbrivau els, ed ord la nebla han ins udiu ina vusch: Quei ei miu Fegl carezau, quel tedlei! 8Ladinamein han ei mirau entuorn e viu negin auter che Jesus persuls cun els.
9Descendend dil cuolm, ha Jesus cumandau ad els da raquintar a negin quei ch’ei vevan viu, tochen ch’il Fegl dil carstgaun seigi buca levaus da mort en veta. 10Ed els ein seteni vid il camond, discutavan denton in cun l’auter, tgei che quei vegli dir: Levar da mort en veta.
